الحياه الزوجيه زي ماهو واضح من اسمها حياه فيها اتنين , زوج وزوجه
اهم حاجه تميز الحياه دي ان فيها تكامل كل واحد ليه دوره اللي يكمل دور التاني هانشوف دور الست ودور الراجل ايه
اسفه خالص ازاي قولت دور الست قبل الراجل لاء طبعا ماتجيش هانشوف دور الراجل ودور الست ايه في قصه التكامل دي
دور الزوجه
ترمي شهادتها الدراسيه في اول صندوق زباله مش هايكون ليها اي لازمه خالص وخساره تاخد مكان علي الفاضي في وسط الاوراق الهامه بتاعه البيت مش معقول هاتحط ورقه لاقيمه لها زي الشهاده دي مع شهادات جوزها او مع فواتير شراء التلاجه والبوتجاز . دي اوراق ليها لازمه شهادتها مالهاش ,
هاتكون حامل بعد كام اسبوع يمكن . يعني هايتغير حجات كتير في جسمها طفل كامل هايتكون في جسمها في تسع شهور
مش هاتقدر تاكل كل اللي بتحبه , ولا هاتقدر تسهر , حركتها هاتكون تقيله وحتي النوم هايكون صعب كام شهر. بس الحكايه دي مش هاتحصل مره واحده لان غالبا هايجيبوا عيلين تلاته فهاتمر بالحجات دي مرتين تلاته
يعني تقولي كده قدامها سنتين وتلات شهور حمل بس ولسه ماحسبناش سنين الرضاعه
بس مش هانوصل للرضاعه علي طول الاول هاتمر بيوم مايعلم بيه الا ربنا اسمه يوم الولاده وده يوم هاتمر فيه الزوجه بالم عمر الزوج ماهايتعرض ليه اكبر الم في حياتها مرتين تلاته برضو بعدد الاولاد
بعدها علي طول هاتبتدي ترضع الاولاد يعني كل عيل مثلا نقول سنه علي الاقل كمان تلات سنين , في الوقت ده كله طبعا هاتستمر تعمل الاكل والشرب لصاحب العظمه جوزها ولاولادها , وتوضبي وتنضفي البيت وتلبسي العيال وتوديهم المدرسه وتجيبيهم من المدرسه وتساعديهم يعملوا الدروس بتاعتهم وتوديهم الانشطه بتاعتهم الولاد يلعبوا كوره وبوكس والبنات بيانوا ورقص كلاسيك
وطبعا الوقت اللي هايكون فيه صحاب السعاده الزوج في البيت لازم يكون البيت نضيف وهدي ولاولاد هاديين وكبايه الحاجه السخنه تكون جاهزه قبل مايطلبها حجات البيت كله مغسوله مكويه
هاتصحي في وسط الليل لمده سنين علي الاقل وممكن المده تستمر اكتر من كده بكتير
لو حد من الاولاد عيان الزوجه اللي هاتسهر معاه ولو واحد من الاولاد قلقان بسبب امتحان او حد مضايقه في المدرسه برضو هي اللي هاتسهر معاه
نسيت اقول ان الزوجه بتخلي صندوق الزباله اللي رمت فيه شهادتها مفتوح علشان هاترمي فيه حجات تاني كتير اعصابها واحساسها ومفاهيمها عن العدل والانسانيه والمساواه والاخاء وكل الكلام الفاضي اللي سمعته وقرته قبل الجواز ده كله قاله شويه رجاله فاضيين كانوا قاعدين مش عارفين يعملوا ايه علي قهوه غالبا قهاوي اليونان من كام الف سنه . ايام الفلاسفه اليونايين لما كانوا بيتكلموا عن المنطق والقيم , وقهاوي فرنسا من كام ميت سنه ايام فولتير وجان جاك روسو , المهم هاتكون مشكله لو الزوجه افتكرت ان الكلام ده ليه علاقه بيها او بعيالها لاء تبقي ساذجه اوي .
الكلام ده معمول للبني ادم اللي قاعد قدامها يتفرج علي التليفزيون
ملحوظه صندوق الزباله اللي الزوجه بترمي فيه شويه الحجات اللي فوق دي من كتر مابستعمله بعض الزوجات بيحصل عندها التباس ويمكن موضوع تعود علي الرمي بتطلع كيس الزباله من الصندوق وبيكون مصير الزوج جوا الكيس مع الحجات دي
لو فيه مشكله في المدرسه طبعا هي اللي هاتروح تحلها ولو فيه حفله للمدرسه او حفله للانشطه بتاعتهم هاتكون هي برضو اللي بتتفرج عليهم فيها ومش بس
في وسط ده كله طبعا لما جوزها يوصل لازم تكون في حاله هاديه وبلاش تكلمه عن مشاكل البيت اصل هاتكلمه ليه هو اصلا مش هايسمع فبتريح نفسها وبتوفر عدد مرات التنفس الزياده اللي هاتصاحب كلامها وهي بتحكي اخبار الاولاد اللي هو مش هايسمعها اصلا
بالليل طبعا هو ليه الحق انها تكون علي اكمل وجه وقفا يعني لازم تتصرف وتلاقي وقت تعملي فيه شعرها وكلها علي الاقل هاتحتاج ساعه كل يوم بين دوش وباقي حجات علشان تخلي نفسها في حاله تليق بوصف امراه
بس مش بس كده هايتخلل حياتها كل سنه فترات اكثر ماساويه الفترات دي اسمها الاجازات والويك اند
الويك اند ولاجازات المفروض ان الطبيعي ان الاسره كلها كل واحد فيها هايعمل حاجه غير معتاده مش بيعملها الاسبوع كله يعني اللي بيذاكر هايبطل مذاكره اللي بيشتغل هايبطل شغل الا الزوجه اللي بتعمله هايزيد تلات اربع اضعاف
كميه اللخبطه والدوشه والبهدله في البيت ولو نزلت معاهم هاتكون مسؤله عن كل حاجه هما صغيرين التواليت والرضعه والاكل والتغير في كل كام ساعه ولو اكبر شويه هاتجري وراهم بسهله ممكن يتوهوا ولو اكبر تاني هاتشوفي كل واحد فين بدل مايتلم عليهم بتوع المخدرات
الاجازه الكبيره بالنسبه للزوجه ممكن نسميها الكارثه الكبيره
بين توضيب الشنط وتوضيب المكان اللي هاتسيبيه وتوضيب المكان اللي هاتوصل ليه ورعايه الاولاد وعمل الاكل طبعا وباقي الحجات كالمعتاد
بس
بس هو ده دور الزوجه مش اكتر
نوصل للقائد الاعلي والامر المطاع الخاضع وصاحب الكلمه العليا والمتوسطه والسفلي والقوام عليها
دوره في هذه الحياه الزوجيه حاجه واحده
هايشتغل
هايشتغل زي ماكان بيشتغل قبل مايتجوزك وزي ماكان هايشتغل لو ماكانش اتجوز
ونفس الشغلانه بتاعته موظف عامل او مدير بيكون معاه في نفس المنصب ستات بتعمل نفس الوظيفه وفي نفس الوقت بتعمل كل اللي بتعمله مراته
واضح طبعا معني التكامل في الحياه الزوجيه
اه نسيت في حاله اي مشكله ماديه استعدي تنزلي تشتغلي اي حاجه لانك طبعا بلا خبره وهاتكوني نسيت معلومات الابتدائيه مش الشهاده العليا بتاعتك بس
